Aproveitando a ponte do Pilar, Montes de Vigo organiza xunto coa Entidade Local Menor de Bembrive unha visita guiada ao Parque Botánico do Arco da Vella localizada no tramo inferior do sendeiro do río Eifonso (PR-G5).
A ruta interpretativa é semicircular, con aproximadamente 3 km de lonxitude, partindo da escultura Land-Art (arte na natureza) que se atopa na Carballeira dos Ramallos
A convocatoria é as 10:30 na Capela de San Cibrao ou dos Ramallos (ver localización) e está previsto que remate sobre as 13:30.
Na visita terase ocasión de coñecer da man de Araceli Abalde, vogal de Medio Ambiente da Entidade Local Menor de Bembrive, a variedade de contidos recapitulados nos paneis colocados durante o percorrido e que conforman 7 sendas asociadas as 7 cores do Arco da Vella: árbores, arbustos e gabeadoras, pequenas plantas e cogomelos, fauna, auga, patrimonio e arte. Estes contidos proceden dun estudo realizado por Afonso González (Afonso "marabillas"), pondo a énfase na gran diversidade de especies autóctonas que existen na ribeira do río Eifonso.
Tamén haberá ocasión de coñecer a figura da mitoloxía prehistórica galega que inspira o nome do parque botánico: a Vella, que moraba as covas nos altos das montañas. Dí a lenda que un dos brazos do seu Arco descende ate o río a beber e a auga absorbida circula polas dúas faixas azuis e é liberada en forma de choiva no outro extremo do arco, regando así a terra. Tamén conta a lenda que cando o pé do Arco da Vella toca o chan, está mostrando a localización dun tesouro soterrado: unha ola chea de moedas de ouro.
De cara a aproveitala visita recopilamos nos seguintes enlaces fotografías de:
a) Paneis explicativos horizontais (premer)
b) Paneis explicativos verticais (premer)
c) Visitas organizadas previamente (premer)
