Finalizado o prazo de inscrición para as actividades programadas para o domingo 14 de outubro, máis de 500 persoas participaran nas distintas modalidades previstas: Andaina pola rexeneración dos montes de Vigo, Trail, Trail Curta e Carreira Popular.
Ao longo deste sábado terá lugar a entrega de dorsais para as tres probas competitivas en Decathlon, en horario de 12 a 14:30 e 17 a 21 horas. Aqueles participantes que o desexen poderán recoller o dorsal na propia proba (Fragoselo - Montes de Coruxo; premer localización) a partir de unha hora antes da saída. En calquera dos casos, entregarase o kit de participante que inclúe a camiseta conmemorativa.
As persoas participantes na Andaina pola rexeneración dos montes de Vigo poderán recoller a camiseta tanto en Decathlon como no inicio da proba. Cómpre lembrar que neste caso o 50% da inscrición adicarase á rexeneración dos montes queimados e á creación do anel verde. Para a Andaina está aberta a inscrición ata o momento de inicio da actividade.
Os horarios de saídas das probas son:
- Trail: 9:30
- Andaina e Carreira Popular: 10:00
- Trail curta: 10:30
Montes de Vigo quere agradecer ás persoas participantes a súa implicación neste evento que pretende lembrar a solidariedade manifestada pola cidadanía de Vigo os días 15 e 16 de outubro de 2017 diante dos incendios vividos nos montes de Vigo e de toda a comarca.
Tamén quere agradecer o apoio decidido do Concello de Vigo neste evento e en todo o programa de actos previsto (premer para consultar), así como a colaboración de Coca Cola, Decathlon, Vigo Entrena, Massini, Inquedanzas Sonoras, Estrella Galicia, Master Cadena - Hermida, Coruxo F.C e Comunidade de Montes de Coruxo.
Máis información de trazados e tracks premendo AQUI.
Para calquera información adicional podedes chamar ao 608 046 047
