A Mancomunidade de Vigo tivo un encontro con José González, Conselleiro de Medio Rural, para abordar diversos temas relacionados cos montes periurbanos de Vigo, entre os que se atopan a franxa de defensa pasiva dos montes nos límites do termo municipal, o anel verde de Vigo e a reforestación dos montes queimados durante 2017.
En palabras do propio Conselleiro, os montes de Vigo son o claro exemplo de montes periurbanos e, sen dúbida, son modelo de xestión por parte das comunidades de montes con un claro uso social. Por tal motivo, a Consellería de Medio Rural ten previsto apoialos dentro do próximo Plan forestal de Galicia, tanto pola súa compoñente de espazo para o goce da cidadanía como liña de defensa diante de eventuais lumes que se aproximen á cidade. Converteríanse así nos primeiros montes periurbanos recoñecidos de Galicia.
Por parte do Presidente de Montes de Vigo, a súa vez, agradeceu a visita realizada e o apoio ás catro comunidades afectadas polos lumes (Coruxo, Comesaña, Valladares e Zamáns) e puxo de manifesto a necesidade da rápida actuación no tocante á franxa de defensa pasiva, competencia exclusiva da Xunta de Galicia, así como no tocante ao Anel Verde de Vigo, onde necesariamente ten que haber coordinación co Concello de Vigo. Ámbalos dous temas son necesarios e complementarios entres sí, e son o único xeito de tentar unha efectiva defensa de Vigo diante dos lumes, evitando o risco que se evidenciou en outubro de 2021.
O Conselleiro concordou nesta complementariedade nas actuacións solicitadas e, particularmente , sobre o Anel Verde, manifestou a súa disposición absoluta a desatascalo de inmediato e a sentarse nunha mesa de traballo mañàn mesmo co Concello de Vigo e Montes de Vigo, para botalo a andar e lograr así atraer fondos Next Generation da Unión Europea. Non facelo sería unha falla de responsabilidade que non debería producirse por falla de entendemento entre administracións.
