Esta mañá tivo lugar a visita da Delegada Territorial da Xunta de Galicia, Marta Fernández-Tapias, aos traballos que está realizando o Obradoiro Dual promovido pola Mancomunidade de Montes de Vigo nos montes de Valladares. Na visita estivo o Presidente de Montes de Vigo, Uxío González, así como representantes das sete comunidades de montes participantes no obradoiro (Beade, Bembrive, Comesaña, Matamá, Valladares, Coruxo e Saiáns).
No transcurso da visita comprobáronse os traballos de rareo no Monte dos Pozos. Tamén se fixo repaso das distintas labouras realizadas ata o momento nas distintas comunidades de montes participantes: roza, plantación, poda, etc. O Obradoiro nos Montes de Vigo iniciouse o 25 de outubro de 2021 e ten unha duración ata xullo de 2022.
No obradoiro participan 12 alumnos-traballadores, de xeito que, ao mesmo tempo que poden obter o certificado de profesionalidade asociado coa figura de peón forestal, desenvolven un traballo directo no monte.
