A Xunta Executiva da Mancomunidade de Montes de Vigo celebrada o pasado 19 de maio aprobou unha serie de propostas de cara a reforma da Lei 13/1989 de Montes Veciñais en Man Común de Galicia, que se recollen no seguinte DOCUMENTO.
Tamén se pode ver a entrevista realizada por Somos Agro da Voz de Galicia (ver AQUI)
A modo de resumo, reflíctese de seguido a proposta a incorporar na exposición de motivos realizada:
Recalcar a particular función social dos montes veciñais en man común periurbanos nos que unha parte da súa superficie ten un uso social exclusivo (parques forestais, miradoiros, áreas de ocio, etc) e outra boa parte están condicionada pola actividade da cidadanía en circulación (sendeiros, pistas forestais, áreas etnoarqueolóxicas, etc), o cal mesmo repercute no tipo de plantacións se van a realizar. Esta realidade viuse incrementada de xeito destacado dende a paulatina saída da pandemia.
Relacionada coa importante presenza de persoas non comuneiras nos montes veciñais en man común, e particularmente, nos montes periurbanos, xorde unha importante problemática relacionada coas responsabilidades civís e, mesmo, penais, derivadas de calquera accidente no monte e no que a gran maioría dos casos as comunidades de montes veciñais non teñen nada que ver nin por acción nin por omisión, pero sendo condenadas con frecuencia subsidiariamente. Este feito está a supor un gran desincentivo para que as comunidades de montes se impliquen e potencien o uso social do monte, mesmo ao punto de limitar ou renunciar a el nos seus plans de ordenación. Cómpre, polo tanto, buscar fórmulas administrativas que saquen ou reduzan esta responsabilidade da esfera das comunidades de montes veciñais en man común, camiñando así cara a unha verdadeira política de promoción do uso social recollida na Lei de Montes de Galicia.
En liña co anterior, as comunidades de montes veciñais en man común que se atopan preto de núcleos con densa poboación vense sometidas a usos indebidos dos seus terreos. A modo de exemplo pódense citar a circulación de vehículos con motor non autorizados ou a descarga de restos de obras. Estas situacións provocan problemas de orde público por enfrentamentos entre comuneiros e condutores dos vehículos non autorizados dada a reducida actuación das forzas de orde público competente. Tamén provocan problemas medioambientais por vertedoiros ilegais nos que moitas veces as propias comunidades de montes unha vez denunciado o feito son elas mesmas sancionadas e obrigadas a asumir os custes de recoller o escombro, particularmente custoso no caso de existir restos de uralitas con amianto.
