Este sábado 15 de outubro tivo lugar o Acto de lembranza do 5º aniversario dos lumes de 2017 que arrasaron un terzo dos montes de Vigo nun só día e que puxeron en evidencia a bulnerabilidade dos montes e tamén o risco que corren as parroquias limítrofes ao monte no caso dun gran lume como o vivido nese ano.
O acto celebrouse no parque forestal dos Monte dos Pozos, na Comunidade de Montes de Valladares. Nel estivo presente a Concelleira de Igualdade de Vigo, Uxía Blanco, o Director Xeral de Montes e de Planificación, José Luís Chan, o Presidente da Comunidade de Montes de Valladares, Gregorio Alvarez, e o Presidente da Mancomunidade de Montes de Vigo, Uxío González, así como representantes da maioría das comunidades de montes de Vigo.
Uxío González rememorou o vivido e puxo de manifesto como se está en proceso de rexeneración dos montes queimados co apoio da Xunta de Galicia e do Concello de Vigo, cun investimento respectivamente de 1,8 millóns e de 1,2 millóns neste período. En todo caso, subliñou o escaso avance vivido dende os lumes en adopción de medidas preventivas do lume tal e como se reflicte no comunicado aprobado pola Asemblea da Mancomunidade e que se recolle máis abaixo. Recalcou que o indicado ademáis ten particular vixencia este ano no que se viviron en Galicia os lumes máis extensos de toda a historia.
Por tal motivo considera necesario facer público que os investimentos necesarios para os cinco próximos anos deben multiplicarse por 10 (ver abaixo apartado de Propostas 15/10/22), acadando un total de 25 millóns de euros a partes iguais entre as dúas administracións con competencias. Por un lado cómpre abordar a faixa de defensa pasiva a crear nos límites cos montes de Nigrán, Gongomar, Mos e Redondela, que é competencia da Xunta de Galicia. Por outra banda, cómpre investir os 10 millóns previstos para o Anel Verde polo Concello de Vigo e que aínda non se fixo siquera o proxecto, así como duplicar a dotación para os equipos de prevención a través do Plan de Emprego e para o mantemento e a conservación das infraestructuras dos parques forestais, miradoiros, etc, do que se benefician cada fin de semana máis de 10.000 persoas.
Pola súa parte, Gregorio Álvarez fixo unha lembranza a toda a cidadanía que colaborou no 2017 na extinción dos lumes e, no seu caso, particularmente aos veciños e veciñas da parroquia de Valladares que estiveron na primeira liña de defensa do monte e da parroquia e grazas aos cales os danos vividos, que superaron o 85% do monte de Valladares, non chegou a afectar a ninguén.
Uxía Blanco lembrou o compromiso do Concello de Vigo coa prevención dos lumes nos montes, tal e como lles compete, e asumiu o reto de abordar os necesarios investimentos nos montes en beneficio da cidadanía que todos os días se beneficia deles. Tamén fixo unha alegoría á situación vivida a través dun fragmento dunha canción de Victor Manuel.
Para rematar, José Luís Chan tamén fixo memoria dos graves lumes vividos en 2017 e como a Xunta de Galicia na maior brevidade posible puxo a disposición unha partida de 1,4 millóns de euros para realizar, en colaboración coa Mancomunidade de Montes de Vigo, o proceso de rexeneración dos montes queimados en Valladares, Coruxo, Comesaña e Zamáns. Tamén está contribuíndo vía outras liñas de axudas a tentar crear as condicións para que os montes sexan o máis resilentes posibles, se ben recoñeceu que aínda hai moito traballo por diante. Fixo unha particular mención a o exemplar traballo que Montes de Vigo fai para buscar solucións que aborden os problemas de grandes lumes que se presentan, e insistiu na necesidade dun traballo de cooperación institucional para abordalos dado que nesta laboura non sobra ninguén.
Finalizou o acto co himno galego interpretado polos Gaiteiros de Pardavila.
___________________________________________________________________________________
PROPOSTAS DOS MONTES DE VIGO CON MOTIVO DO 5º ANIVERSARIO DOS LUMES PRESENTADAS DURANTE O ACTO CELEBRADO O 15 DE OUTUBRO DE 2022
A Mancomunidade de Montes de Vigo, que aglutina as
14 Comunidades de Montes (Beade, Cabral, Candeán, Castrelos, Comesaña, Coruxo,
Lavadores, Matamá, Oia, Saiáns, Teis, Valladares e Zamáns, xunto coa Entidade
Local Menor de Bembrive) activas no
termo municipal, cun total do 17% da superficie de Vigo e a máis de 4000
comuneiros e comuneiras, lembra este 15 de outubro de 2022 os cinco anos dos
fatídicos incendios de 2017 nos que en 8 horas ardeu un terzo dos montes de
Vigo, case 600 hectáreas.
Na Asemblea da Mancomunidade do pasado luns 10 de outubro
fíxose un balance destes 5 anos e chegouse á conclusión de que pouco se
avanzou dende 2017 en dous aspectos que se consideran de vital importancia
para a sociedade viguesa e da súa contorna:
a) Definir unha estratexia de
protexer do lume o maior monte periurbano de Galicia. A
competencia neste ámbito a comparten Xunta de Galicia e Concello de Vigo.
A Xunta de Galicia,
como responsable das políticas de prevención dos incendios, debe abordar de
inmediato unha faixa de defensa pasiva nos límites dos montes con Nigrán,
Gondomar ou Redondela, incorporando na medida do posible as novas
investigacións que se están realizando dende a Universidade de Vigo para
abordar a problemática dos grandes lumes.
O Concello de Vigo, como
responsable da biomasa da faixa secundaria, debe acelerar os trámites que
posibiliten o desenvolvemento do anel verde de Vigo como instrumento de prevención
de lumes nos núcleos de poboación e, aproveitar para ser un espazo de lecer e encontro
da cidadanía.
En definitiva, cómpre protexer á poboación, si. Pero tamén cómpre non abandonar os montes á súa sorte no caso de lumes dado que é un patrimonio natural do que se beneficia toda a cidadanía.
b) Incorporar os montes de Vigo
nunha rede de infraestruturas verdes en terreos forestais tal e
como recolle o Plan Forestal de Galicia 2021-40 e recomenda a Unión Europea.
Nesta laboura tamén teñen que implicarse Xunta de Galicia e Concello de Vigo,
pero dun xeito decidido e non dun xeito residual como se ten feito ata agora.
A modo de exemplo, estimamos que cada fin de semana fan
uso dos montes de Vigo entre 8.000 e 10.000 persoas, superando esta cifra
moitos fins de semana do verán. Estas cifras aumentouse significativamente
durante a pandemia, e non minguou pasada esta.
Nestes últimos 5 anos, a Xunta de Galicia dotou unha
partida de 1,4 millóns de euros na repoboación dos montes queimados e aínda
está pendente de rematar o investimento, así como 400.000 euros en sendos obradoiros
forestais. Pola súa banda, o Concello de Vigo a través do Plan de Emprego
Municipal e das partidas adicadas aos mantementos dos Parques Forestais e
Sendeiros, adicou 1,2 millóns de euros.
Consideramos que estas cifras son claramente
insuficientes para dar atención ao fluxo permanente que soportan os montes
periurbanos de Vigo e para adiantarnos aos lumes que todos os expertos nos din
que seguramente van a volver facer acto de presencia, máis cedo que tarde.
Proposta da Mancomunidade de Vigo para os vindeiros 4
anos:
Dado que os lumes deste verán en todo Galicia nos
lembraron que hai que despregar o antes posible as políticas preventivas contra
os lumes, a Asemblea da Mancomunidade de Montes de Vigo quere facer unha dobre
proposta ás Administracións competentes por importe de 25 millóns de euros, que
se adicarían a:
a) a) Xunta de Galicia: realizar un investimento nos montes de Vigo e comarca para prevención de lumes por importe de 12,5 millóns de euros.
b) b) Concello de Vigo: realizar
un investimento no Anel Verde de Vigo de 10 millóns de euros, tal e como
se comprometera no ano 2018 no proxecto inicial realizado, así como adicar
2,5 millóns de euros en duplicar os recursos destinados ao mantemento e
conservación dos Parques Forestais e infraestruturas de uso social do monte
da que se beneficia toda a poboación de Vigo.
Presentamos esta proposta neste día tan sinalado do 5º
aniversario dos lumes de outubro de 2017 e comprometemos o noso esforzo en
loitar porque se materialice en ben da sociedade para a que levamos
contribuíndo dende hai máis de 25 anos.
Uxío González, Presidente de Montes de Vigo (15/10/22)
_________________________________________________________________________________
COMUNICADO MONTES DE VIGO CON MOTIVO DO 5º ANIVERSARIO DOS LUMES
Neste quinto aniversario quérese dar a coñecer á sociedade viguesa o balance do proceso de rexeneración destes cinco anos e os retos que se consideran imprescindibles abordar se se lle quere deixar aos nosos descendentes un entorno mínimamente digno.
O vindeiro 15 de outubro de 2017 xa fan 5 anos de que un incendio de 6ª xeración chegase aos Montes de Vigo e arrasase 566 ha de monte, un terzo dos montes periurbanos de Vigo, e asolaron case completamente os montes de Coruxo, Comesaña, Matamá, Valladares e, parcialmente, Zamáns.
As imaxes que durante este verán puidemos observar na televisión lembrounos aquel día fatídico que non se borra da memoria. Non podemos facer outra cousa que solidarizarnos con distintos territorios que sufriron esta lacra. Agora, para eles, arranca o proceso de rexeneración, que no noso caso levamos un lustro.
En primeiro lugar, despois de facer accións de urxencia para que o solo non se perdera e con ilo perder centos de anos de actividade natural, o traballo realizado de inmediato foi retirar a madeira queimada. Precisamente neste aspecto maniféstase a diferencia con moitos enclaves particulares, que foron abandonados e agora as árbores secas e podridas resultan un perigo ou rebrotaron fundamentalmente os eucaliptos.
Simulación do Anel Verde e un exemplo e aplicación no monte
