Entre as demandas que a Mancomunidade de Montes de Vigo lle fai ás formacións políticas para a vindeira lexislatura atópase abordar con carácter urxente a atención dos parques forestais de Vigo, diante do manifesto abandono que presentan e da expiración dos convenios para o uso dos mesmos que teñen suscrito as Comunidades de Montes co Concello de Vigo.
Para poder abordar correctamente a xestión dos parques forestais por parte do Concello de Vigo e facer unha planificación dos investimentos nestas instalacións coherente, é preciso establecer un novo conenio-marco único para todas, no que se actualicen e homoxenicen os termos duns acordos que levan vixentes máis de 25 anos e que recollan as necesidades propias dos tempos que corren, con miles de cidadáns e cidadás empregando os servizos dos parques a diario e cunha carencia de servizos evidente.
Polo citado, a Mancomunidade de Montes de Vigo, tras o mandato recibido da Asemblea do 8 de maio, solicita da nova corporación resultante das eleccións do 28 de maio de 2023 que aborde de xeito urxente este tema, pondo en modo espera calquera renovación de convenios solicitado ás Comunidades de Montes por parte do Concello de Vigo tal e como se ten constatado despois de haber iniciado a Campaña de comunicación sobre o estado dos parques forestais o pasado 11 de maio.
