A Asemblea da Mancomunidade de Montes de Vigo celebrada o luns 8 de maio de 2023 aprobou por unanimidade o documento "Demandas ás formacións políticas diante da vindeira convocatoria de eleccións municipais do 28 de maio" (PREMER AQUI) no que se recollen 4 puntos estratéxicos que se consideran prioritarios na xestión municipal de cara aos vindeiros 4 anos .
As catro prioridades que o movemento comunal de Vigo establece para o vindeiro mandato municipal son:
1. Axilizar e reforzar as accións de prevención de incendios, vistos os nulos avances nesta liña no último mandato municipal.
a) Crear o Anel Verde o máis axiña posible, como corta lumes próximo as casas ademais de converterse nunha infraestrutura deportiva e de lecer para toda a cidadanía en liña co que en Europa é unha realidade dende hai ben anos.
b) Reforzar as cuadrillas de limpeza e conservación do monte periurbano que actualmente están financiadas polo Plan de Emprego Local.
2. Abordar con carácter urxente a atención dos Parques Forestais segundo o convenio existente e o establecido nos pregos da contrata correspondente.
3. Implantar un programa permanente de educación e dinamización nos Montes de Vigo, centrándose no coñecemento do monte por parte da cidadanía e particularmente dos escolares.
4. Buscar unha solución permanente a actuacións non respectuosas co medio ambiente: depósito de restos de obras e outros obxectos nos Montes de Vigo e circulación indebida de vehículos de motor
A valoración económica das propostas realizadas recóllense no cadro que se achega e claramente teñen unha vocación de uso social do monte periurbano, no que o caso de Vigo é un referente en Galicia e o estado español segundo recoñecen os estudos da Universidade de Vigo e que teñen sido publicados en diversos foros europeos.
Montes de Vigo ponse a disposición das formacións políticas que se presenten as eleccións municipais para dar a coñecer con detalle as citadas propostas e, se o teñen a ben, incorporen as mesmas na súa oferta electoral co obxecto de mellorar a calidade de vida dos vigueses e viguesas, así como incorporase plenamente nas recomendacións que a Unión Europea e as Nacións Unidas fan de crear "bosques urbanos".
