Infraestructuras verdes, territorio resilente e transición enerxética comunitaria: temáticas de interese para Montes de Vigo

Esta última semana de maio resultou intensa en intercambio de experiencias e coñecementos sobre aspectos de moito interese para as Comunidades de Montes de Vigo: novas liñas de traballo na xestión comunitaria do monte.

O martes 26 de maio tivo lugar o Congreso Green Gap baixo o título "Innovación en infraestructuras verdes", promovido polo Concello de Pontevedra. Aparte de afondar na experiencia que en distintas cidades de España e Portugal están tendo sobre as infraestructuras verdes, tamén se abordou un aspecto novidoso: os modelos de custodia do territorio para abordar a xestión destas infraestruturas verdes. Este aspecto é unha liña de traballo que se ve como fórmula de traballo coa Fundación Montes de Vigo 2046.

O xoves 28 de maio celebrouse o Foro Territorio Rural Resilente en Santiago, promovido pola Fundación Juana de Vega e o Laboratorio do Territorio da USC. Presentouse o Plan estratéxico do Foro e as liñas de actuación abertas, nas que se implicaron entidades sociais, administracións públicas e empresas interesadas en promover o desenvolvemento sostible do rural galego e comprometidas en achegar coñecemento e recursos para executar o citado plan. Máis de 120 entidades se adheriron á Alianza polo Territorio Rural Resilente, entre as que atopa a Mancomunidade de Montes de Vigo. Máis información nesta NOVA de Campo Galego.

Para rematar, este venres 29 de maio tivo lugar o Encontro de entidades comunitarias que traballan e impulsan a Transición Enerxética Comunitaria, promovido polo Observatorio Eólico de Galicia. Un interesante lugar de encontro no que moitas Comunidades de Montes están explorando vías de xestionar o seu territorio dun xeito comprometido co seu entorno e alternativo ao modelo imperante.